సాయంకాలాలు

మధ్యాన్నం వండిన ఎండ
నంతా నీడలు మింగేస్తూ
మూల మూల గిన్నెలు
ఖాళీ చేస్తున్నాయి
మూల మూల పగటి
వెలుతురి గిన్నెలు

ఆవురావురు మంటూ
పిల్లలూ లేగ దూడలూ
పాల కోసమో
తెల్లని వెన్నెల కోసమో
రాతిరి వెలుతురి కోసమో
అమ్మ అవని పొదుగు ని
ఆశ్రయిస్తున్నారు .

రాత్రి మనం చేసే గానా బజానా కి
బయానా అంటూ చుక్కల
ధన రాశులు కుమ్మరిస్తున్నాడు
ఆకసాన మాయా చంద్రుడు

సాయంకాలం
ఆ సంధ్యా కాలం
సంధ్య కాంతుల
మిస మిసలని
పంచుకుంటూ
చెలిమి కూరిములు
చలమల వద్ద
దాహం తీర్చుకుంటూ
చెలికాండ్రు ..చెలులూ

సాయంత్రం
అందంగా ముస్తాబయింది మరి
ఏ విభుని దర్శనం కోసమో !

వసంత లక్ష్మి