రంగు రంగులు

తెలుపా నలుపా
అంటూ రెండు
రంగులు చూపిస్తే
దిక్కులు చూస్తాను నేను

ఏవీ వాటి మధ్య
ఇంద్ర ధనుస్సుల రంగులు
పాపాయి నవ్వులు
పూలల్లో చిందులు

ఆకుల మధ్య
జల్లిడ పట్టిన
వెలుతురు కళ్ళాపులు
పచ్చదనం పురుడు
పోసుకోడానికి తహ తహ లాడుతున్న
భూమి  నెర్రల రంగులు

ఆ కొండల పై
ఆర బోసిన తుది కిరణం
సాక్షిగా చీకటి నలుపు
ఉదయపు తెలుపుకి
తలుపు అని తలుస్తాను .

సముద్రానికి రంగే లేదని
ఆ నింగి దయగా ఒంపిన
రంగే తనది చేసుకుంటుందని
రంగుల ఉనికి , ఆ క్షణానికి
అరువు ఇచ్చిన కోక అని
తెలుసా మరి సముద్రానికి .

ఒక్క రంగు సొంతం
చేసుకుని మిగిలిన రంగులని
ఒంపుకుంటానా ?
ఎప్పటికప్పుడు ఆ కాలానికి
తోచిన, నప్పిన రంగులు
నింపుకునే ప్రకృతే నాకూ ఆదర్శం .

తెలుపా నలుపా
అని నన్ను ఇబ్బంది పెట్టకండి మరి
ఎన్నడూ !

వసంత లక్ష్మి
కువైట్
26- 02 - 2016 .