వసంతం అంటే
నూతనంగా తోట
అలంకరణే..
పద్మం చుట్టూ
తిరిగే తుమ్మెదకు
బురద ఊసు ఏల
మబ్బులు వర్షం
నీటిని కూర్చుకుంటూ
ఏమాలోచిస్తాయో ,
ఏ ఊరుకి ఎంత ప్రాప్తమో అని ..
పువ్వు చెప్పే కథ
ఎంత రహస్యామో
చెవి ఒగ్గి వినే తుమ్మెదకే ఎరుక.
గాలి వీచడం
వెనక ఎవరి శ్రమో కానీ
చెట్టు చేమా మాత్రమే
తలలుపుతూ గుర్తిస్తాయి.
పిట్టా చెట్టుల
బంధం ఎంత గట్టిదో కానీ
పాట పాడి ఋణం తీరుస్తాయి.
గడ్డి పువ్వు నేల
తల్లితో కబుర్లు చెప్తూ
దూరం పెరిగిన వృక్షాల
ఊసు మరిచిపోతుంది.
ఆకాశం పలు రంగులు
పరుచుకుంటూ
అంతు లేని ప్రయాణపు
ప్రయాస మరిచిపోతుంది.
ఉదయించే సూర్యుడి
పయనం ఎంత దూరమో
ఎప్పుడూ కొలిచినట్టు లేదు
అస్తమయం తప్పదు అని నిశ్చింత .
కామెంట్‌లు లేవు:
కామెంట్‌ను పోస్ట్ చేయండి