దినాలు ...365 రోజులు

భగ భగమని మంటలు
నా చుట్టూ
వసంతం వచ్చేస్తోంది కోయిలా
ఎక్కడికి పోయావు ? గొంతు సవరించుకో .

ఏ కొమ్మ పై వాలను ?
ఏ చిగుర్లు మేయను ?
యే కోయిల మరి కుహు కుహు
అంటూ తిరిగి జవాబు చెపుతుంది ?

వేప చెట్లు ,రావి చెట్లు ,మర్రి చెట్లు
ఊరు ఊరుకి అమ్మ లా వీవెనలు ఊపుతూ
మాయం అయి పోయి ,ఇనప చెట్లు ట
మొలిచాయి వాడ వాడ లా ,
యే చెట్టు పై వాలను ?

మండుటెండ కాల్చేస్తోంది ,
చుక్క నీరు లేవు ,ఏ పక్క
కుహు కుహు అని యే చిగురు తిని
సవరించుకోను గొంతు ?

మా అమ్మ కథలు చెప్పేది
ఊరి లో పిల్లలు చెట్లు కింద చేరి
అల్లరిగా కూ కూ అంటూ కూతలు
కూసేవారట , చదువుల బడి జైలు ట
ఇప్పుడు చెట్టు పుట్ట కొండా అన్ని
పుస్తకాల మీద బొమ్మలై పోయాయి ట .

ఇంకెక్కడ అల్లరి ? ఆటలు ?
ఇంకెక్కడ వసంతాగమన సంకేతాలకై
ఎదురు చూపులు ,
పట్టణాల లో అన్ని ఋతువులూ
ఒక్కటే ,మండే ఎండలు ..అంతే ..

నీ చేత్తో నీవు తవ్వుకున్నావు గొయ్యి
నీ వినాశనం నీవే కోరి తెచుకున్నావు
అంటే నమ్మరు ఈ జనం ..
ప్రకృతి ని రక్షించండి అంటూ కవితలు
అల్లుతారు , ఒక్క మొక్క నాటండి అంటే
అమ్మూ నా ఫేస్ బుక్ లో కొంపలు అంటుకుంటాయి
నే ఒక్క క్షణం మిస్ అవుతే అంటూ బడాయిలు పైగా

అడవి కి ఒక రోజు ,పిచుక కి ఒక రోజు
పులి కి మరో రోజు , ఆడ పిల్ల ల కి కూడా
ఒక రోజు ట ,ఇన్ని నోట్లు , నాణాలు కంచం లో
పోసుకుని తింటరా ఏమిటి ? అదీ చ్హూద్దాం ..

నల్లటి కోయిల కార్చిన కన్నీటి చుక్క
మరి నలుపులో కలిసి , కనిపించనే లేదు ..
రండి ,మరో రోజు జరుపుకుందాం ..పోనీ
కోయిల కి ఈ రోజు పెడదాం ...సరి పోతుంది ..

మనం చేయ గలిగింది అదే ..
దినాలు .. హుహ్ ..పెట్టు కోవడమే ..
రండి ,365 రోజులు ..దినాలు గా ప్రకటిద్దాం ..
ఈ ఫేస్ బుక్ లో నే జరుపుకుందాం ..శుభం ..