ఏ ముక్కలు కావాలో ...మీకు.

ఒక తల లోపల ఒక మెదడు..
అవసరం లేదు..మేమున్నాం 
మీకు ఆలోచనలు నింపడానికి 
ఒక మొహం..కళ్ళు, 
అందం గా ఉంటే చాలు పద్మా ల్లగా 
మా తప్పులు, మా ఒప్పులు గా 
చూస్తే చాలు..
ఇంకా మొహం కూడా చంద్ర బింబం..
మేమ్ ఆసిడ్ లు అవి పోయడానికి 
బ్లేడ్ తో చేక్కేయడానికి..
చేతులు తామర తూడు లాగా 
బలహీనం గా...మా చేతి ఆధారం గా 
బతక డానికి, ఇంకా కాళ్ళు ...
ఎప్పుడూ వెనక్కి నడవ డానికి 
గుర్తు గా ...పాదాలు కాస్త ముడుచుకుని ..

అంగ అంగాలు కోసి ,మీకు ఒక 
ప్రసాదం లా నైవేద్యం చేయాలి..
ఇదిగో, ఇవి పడేస్తున్నాం..ఇవే కదా..
మీకు కావాల్సిన అంగాలు..
కుక్క నోటికి మాంసం ముద్దల్లాగా..
మీరు కొరుక్కు తినడానికి..
ఛి, ఫో .అన్నా..మా వెనకే  వస్తారేం..
మీకు కావాల్సిన ముక్కలు వేసాం  కదా.

మా మానాన మమ్మల్ని వదిలేయండి..
ఏలుకున్నది చాలు, పోషించినది చాలు..
మాకు వండు కోడాలు వచ్చు,
మా కాళ్ళ మీద మేము నిలబడడమూ వచ్చు..
మహా ప్రభో, మీకో దణ్ణం..అన్నా వదలరు..

రోజు ., ఇంత వండి పెట్టడానికి ,
ఇంత కాఫీ నీళ్ళు పోయడానికి..
మేమే కావాలి..కాని, పెత్తనం మటుకు 
మీదే ..ఎందుకు సహిస్తున్నామో ..
మీకు తెలుసా అసలు..

మా అంతరంగాలు లోకి తొంగి 
చూస్తే తెలుస్తుంది..కసువు ఊడ్చి 
మూల పెట్టినట్టు, మీరు ఎలా పడి 
ఉంటారో ,ఒక మూల..

అందరూ ఒక్కటి కాదు..అని మూలుగు 
అవును చిత్ర హింసలు, పలు రకాలు..
ప్రేమ పేరుతో మరింత చిత్రం అవి..
సృష్టి కార్యం కోసమేనా ? ఇన్ని తొడుగులు?

ఎంత జుగుప్స కలిగించినా , స్త్రీ 
ఎందుకు ఇలా లొంగి ఉంటుందో..
మీకు అర్ధం అయిన రోజు..
చచ్చి మళ్లీ పుడుతారు..

నాలోనూ ఇంత క్రోధం, ఇంత చిద్రం 
అయిందని మనసు, ఇవాళే తెలిసింది..
ఆబల అంటూ, మాంసం ముద్ద చేసేరు
అని ఆర్తనాదం విన్న ఈ క్షణమే, నా 
మనసు ,నా శరీరం ముక్కలు ముక్కలు 

గా విడిపోయింది..ఏ ముక్క కావాలో 
ఏరుకోండి..ఏ ముక్క కావాలో ఏలుకోండి..
ముక్కలు ముక్కలు అయిన ఈ శరీరం 
లో ఏ ముక్కలు కావాలో ...మీకు..