నది

కరిగి పోయిన నాగరికత కోసం 
వెతుకుతూ నది పరుగులు ,
ఒక్కసారి వెనక్కి చూసి వద్దాం 
ఏవి ఆ సింధు ,హరప్పా నాగరికతలు ?
ఏవి ఆ మానవ సముదాయాలుమిగిల్చిన
నది ఒడ్డున ఆనవాలు ?


సముద్రాలు నదిని మింగి అంతా 
కన్నీటి సముద్రాలు చేశాయా ?
ఉప్పు పాతరలు కడుపులో దాచుకుని 
సముద్రం, నీటి మేఘాలు పైకి పంపితే 
మానవ నాగరికత లో మానవత్వం 
ఆవిరి అయిపోయి, ఆమ్లాలను వదులుతున్నారు .. 

పసి మొగ్గలని చిదిమే పూల బేరగాళ్ళు 
విచ్చలివిడిగా బజారు లో పూల బేరాలు ఆడుతున్నారు 
పువ్వు అయతే చాలు నలిపేయాలని ఉత్సాహం 
చప్పట్లు కొడుతూ ఉత్తేజపరిచే నర సమూహాలు .. 
నరమాంసం రుచి చూసిన మృగానికేనా ,
ఆకలి తీరితే జాలి కలుగుతుంది, ఈ నరుల తీరే వేరు . 

నాగరికత నదుల వెంట వెలిసిందిట , 
నది మొహం చాటేసింది , ఈ రోజు 
నరుడు వదిలేసిన నానా చెత్త ,రొచ్చు 
భరిస్తాను కాని, ఈ రొచ్చు మానవుడి నా పక్క వద్దు 
అంటూ ,నది రోజు రోజు కి చిక్కి సల్యం అయిపోతోంది . 
నది నాగరికత అడుగు జాడలు కోసం వడి వడి గా 
ఎటు ప్రవహిస్తోంది? తనలోకి తనే ,అంతే మరి ,మరో దారి లేదు ..