అక్షరం ఆయుధం

అక్షరం ఆయుధం అంటే ఏమిటో 

అనుకున్నాను, ఇది చెడు, అని 

రాసిన వెంటనే, అదిగో చూడు 

మాటల మెలికల గుచ్చడం..

అక్షరం లో ఒక ప్రయాణం ఉంది.

రాసిన వాని, మెదడు పొరల లో 

పుట్టిన ఒక ఆలోచన కాంతి వేగం 

తో చదువరి ని చేరుతూ ,తన 

గమ్యం చేరుకొని అక్కడ ఇంక 

తిష్ట వేస్తుంది..పిలవని అతిథి 

ఏమి కాదు, పిలిస్తే నే వచ్చింది..

మరి ఇంక గూడు కట్టుకుని 

నీ మెదడు ని చీల్చి, ఎంతో 

కొంత చిన్న భిన్నం చేస్తుంది..

అక్షరం ,అమరం..చావు లేనిది.

అక్షరం బాధ్యత , స్కూల్ 

మాస్టారు నేర్పించినప్పుడు 

నల్ల బల్ల మీద తెల్ల సుద్ద గీతలే,

చందమామ కథలో రాజకుమారిడి 

వైనాలు, రాక్షసుల క్రీడలు ,రాణి 

గారి అందాల ప్రేమ చూపించిన 

ఈ అక్షరమే, ఆరేడు భాగాలుగా 

విడిపోయి, సైన్సు, సోషలు, అంటూ 

విభజించింది..నా మెదడి పొరలను..

ఇంకా వార్త లలో అక్షరం ,ఒకటి 

నే చూసేది మరొకటి..

నేను ఇప్పుడు ఏం రాయాలి అన్నా 

ఒకటికి పది సార్లు ఆలోచించాలిట ...

వీరికి ,వారికి కోపాలు రాకూడదు,

అల్ల వారికి అలక, అన్ని వేపులా 

చూసుకుంటూ ,వేయాలి ట ,ఒక్కో 

అడుగు, ఒక్కో అక్షరం..ఒక్కో పదం..

అందుకే మరి అక్షరం ఒక బాధ్యత..

నా వేలి చివర అక్షరాలు , ఎదురు 

చూస్తూ ఉన్నాయి దూకడానికి 

కాగితం మీదకి, అయినా నేను 

బిగించి మెడకి గొలుసులు ఆపి 

ఉంచుతాను, గాలి వాటం ,

ఆ వాదం. ఈ వాదం..కుడి ,ఎడమ లు 

అన్ని బాగా చూసుకుని, అప్పుడు..

అప్పుడే వదులుతాను, మెడ కి 

కాలికి వేసిన గొలుసులు.

అక్షరం..అప్పుడప్పుడు ఎదురు 

తిరుగుతుంది, నేను నిస్సహాయత 

నటించి ,మళ్లీ నా దారి లోకి 

తెచ్చుకుంటాను..నా వేళ్ళ చివరే 

ఆడుకోనిస్తాను ...అక్షరం..