పెను నిద్దుర ...

అర్ధరాత్రి నిద్దురలో మెలకువ 

వచ్చి కల ని సరి జేసుకున్నాను 

నా కల నేనే రచిస్తాను ,రోజూ 

మెలకువ లో తీరని కోరికల 

పట్టి ఒకటి తయారు చేసి, 

తల కింద పెట్టుకుని , కలత గా 

నిదుర పోతాను, కల ఒకటి 

వస్తుంది, నా కోరిక తీరిన కల 

ఇంతలో మెలకువ కూడా , 

ఇలా నా జీవితం మొత్తం 

నిదుర లోనే గడిచి పోతుంది . 

జీవించడం అలసట 
అనిపించి ,అప్పుడప్పుడు ఇలా 
కలత నిదురో, కలో తెలియని 
అయోమయం లోకి వెళ్లి 
అలసట తీర్చుకుంటాను . 

ఎందుకో ధైర్యం గా 
పులి నైనా ఎదుర్కుంటాను కాని ,
ఈ జీవిత వ్యాఘ్రం నన్ను తినేస్తూ 
నా ఎముకుల బోలు ని 
రాల్చేస్తూ కాల్చేస్తుంది నిలువునా .. 


ఇంక ఎప్పుడయినా ఆలోచిద్దాం 
ఎలా జీవించాలో ?
ముందు నన్ను ఆత్మరక్షణ 
చేసుకోనివ్వండి , 
నా వెనకకి పరుగుని ఆపకండి ,
దయచేసి .. 
నా పెను నిద్దుర లోకి 
నా ప్రయాణం ఆపకండి మరి ..