సుఖం ..దుఖం ..

మరపు అదృష్టమో 
కాదో ,వద్దు వద్దు అనుకున్నవి 
పదే పదే గుర్తు  చేస్తుంది . 
ఎంతటి గొప్ప అనుభూతి అయినా 
రేపటికి మసక బారుతుంది . 

వాడిన మల్లెపూలు ఎత్తి 
కిటికీ బయట విసిరేసినట్టు 
అనుభూతి విభూతి లా జలజల 
రాలిపడిపోతుంది మాపటికి .


పురాతన దుఖాలు మటుకు 
రేగి ,రేగి, పుండులా 
ఎప్పుడూ సలుపుతూ ఉంటాయి ,
దుఖం కి జీవిత కాలం అంత ఎక్కువేమిటో ? 

దుఖం వెనువెంటే నీడ లా 
సుఖం పక్క పక్క నే హితుడి లా 
సూర్య చంద్రులు లాగ ఒకరి మొహం ఒకరు చూడరు . 
నాకేమో రెండు కలిసిన  క్షితిజ రేఖ దగ్గర 
ఉండిపోవాలని చిరకాల కోరిక ,ఫలించేనా ? 

సుఖం అంటే ఏమిటో ఎలా తెలిసేను 
నీకు దుఖపు క్షణాలతో పోలికతో కదా 
సమ స్థితి అంటూ లేదు అంతా 
సాపేక్షం అమ్మా అంటూ నా కొడుకు చేసేడు ఉపదేశం . 

తరచి చూస్తే అదే కదా సత్యమ్  
అదే కదా సత్యం శివం సుందరం .